LJUSSENS – De Ljussemer toanielploech ‘Mei Nocht foar ’t ljocht’ hat freed 17 en sneon 18 febrewaris wer garant stien foar twa noflike jûnen toaniel. Se spilen it stik “Yn’e prizen”, in fleurich stik fan Henk Sloots.

Beide jûnen wie de seal moai beset en koene de minsken genietsje fan in kluchtige komeedzje. Gerben Hoekstra regisearre it stik foartreflik. De ynstekster wie Sjoerdtje Bakker-Visser. Foar it grimearjen soarge Jikke Sytsma. Margriet Wytsma soarge foar lûdeffekten.

It stik spile him ôf yn it hûs fan Geart en Bertha Bonkema. We kamen yn ’e kunde mei dit stel doe’t se krekt de strjitpriis yn’e postkoadelotterij wûn hiene. Tenminsten, as Geart net ferjitten hie harren op te jaan. Geart doarde dit net te fertellen oan Bertha en besike gau oan jild te kommen.

Doe’t de tante fan Bertha, in rike widdo, op besite kaam, rûkte Geart syn kâns. Hij frege syn buorman Piter te helpen. Mar Sjouk, Piter syn frou, goaide sûnder dat se der erch yn hie, hieltyd roet yn it iten. It waard noch in hiele toer om dit goed ôfrinne te litten.